Mary E. Brunkow, Fred Ramsdell dhe Shimon Sakaguchi janë shpallur fitues të Çmimit Nobel në Mjekësi për vitin 2025, për zbulimet e tyre të rëndësishme mbi tolerancën periferike imune – një mekanizëm thelbësor që ndihmon trupin të parandalojë reagimet autoimune, duke shmangur sulmin ndaj indeve të veta.
Lajmi u bë i ditur të hënën në Stokholm, nga Instituti Karolinska, që ndan tradicionalisht Çmimin Nobel në Fiziologji ose Mjekësi. Tre studiuesit do të marrin zyrtarisht çmimin gjatë ceremonisë që do të mbahet më 10 dhjetor.
Toleranca periferike imune luan një rol jetik në ruajtjen e ekuilibrit të sistemit imunitar, duke e penguar atë të dalë jashtë kontrollit dhe të shkaktojë sëmundje autoimune.
Që nga themelimi i tij më 1901, Çmimi Nobel në Fiziologji ose Mjekësi është dhënë 115 herë, për gjithsej 229 laureatë deri në vitin 2024. Vitin e kaluar, çmimi iu nda shkencëtarëve amerikanë Victor Ambros dhe Gary Ruvkun, për zbulimin e microRNA-ve, një tjetër arritje madhore në biologjinë molekulare.