Presidenti rus Vladimir Putin ka deklaruar se forcat ruse kishin pushtuar gati 5,000 kilometra katrorë tokë në Ukrainë në vitin 2025 dhe se Moska mbajti iniciativën e plotë strategjike në fushën e betejës.
Putin, duke iu drejtuar një takimi me komandantët e lartë ushtarakë rusë në ditëlindjen e tij të 73-të, tha se forcat ukrainase po tërhiqeshin në të gjithë sektorët e frontit, shkruan Reuters, transmeton Dukagjini.
“Në këtë kohë, forcat e armatosura ruse mbajnë plotësisht iniciativën strategjike. Këtë vit, ne kemi çliruar gati 5,000 km katrorë territor – 4,900 – dhe 212 lokalitete”, tha Putin në takimin.
Ministria e Mbrojtjes e Rusisë raportoi të martën kapjen e dy fshatrave të tjerë përgjatë frontit, të cilat komandanti i lartë i Ukrainës thotë se tani shtrihen mbi 1,250 kilometra.
Ushtria e Ukrainës në gusht i hodhi poshtë ofensivat e fundit të Rusisë si një dështim, me forcat e Moskës që dështuan të kapnin një qytet të madh ukrainas këtë vit.
Raportet ukrainase thonë se trupat e Kievit kanë arritur përparime në rajonin e Donetskut, veçanërisht rreth Dobropillia, një qytet pranë qendrës kryesore logjistike të Pokrovskut. Presidenti Volodymyr Zelensky ka thënë gjithashtu se forcat ukrainase kanë rifituar terren në rajonin kufitar Sumy, ku Rusia ka krijuar një pikëmbështetje.