Shërbimet spanjolle të emergjencës kanë nxjerrë trupat e katër personave nga rrënojat e një ndërtese gjashtëkatëshe që u shemb në qendër të Madridit.
“Me trishtim të thellë konfirmojmë se zjarrfikësit e Madridit kanë nxjerrë trupat e personave që u zhdukën pas shembjes,” shkroi kryebashkiaku, Jose Luis Almeida në X, shkruan Reuters, transmeton Dukagjini.
Viktimat janë identifikuar si tre burra të moshës midis 30 dhe 50 vjeç nga Ekuadori, Mali dhe Guinea-Conakri të punësuar në vend si punëtorë ndërtimi, si dhe një grua 30-vjeçare, arkitektja e projektit të rinovimit të të njëjtës ndërtesë.
Trupat e viktimave u gjetën herët të mërkurën, gati 15 orë pas shembjes së strukturës së brendshme të ndërtesës, në një operacion kërkim-shpëtimi në të cilin policia dhe zjarrfikësit përdorën dronë dhe qen teksa tre punëtorë të tjerë ndërtimi u plagosën.
Sipas regjistrit online të ndërtesave në ndërtim e sipër të Madridit, prona ishte ndërtuar në vitin 1965 teksa iu nënshtrua dy inspektimeve teknike në vitin 2012 dhe 2022 dhe u klasifikua si “e pafavorshme” për shkak të gjendjes së përgjithshme të fasadës, pjesës së jashtme, mureve ndarëse, çatisë, tarracave të çatisë dhe sistemit hidraulik dhe të kanalizimeve.