Kandidati për kryetar të Prishtinës, Uran Ismaili, ka mbajtur sonte tubimin përmbyllës, të fushatës ku para një numri të madh qytetarësh në sheshin “Skënderbeu”, ka dhënë mesazhin e tij të fundit para zgjedhjeve të 12 tetorit.
“Jemi në një moment vendimtar për kryeqytetin,” tha Ismaili, duke theksuar se qytetarët po zgjedhin mes dy mënyrave të qeverisjes: “Në njërën anë është mendësia e katër viteve të fundit, mendësia e konflikteve, arsyetimeve dhe premtimeve të harruara, që kujtohet për qytetarët vetëm kur afrohen zgjedhjet. Në anën tjetër është mendësia që përfaqësoj unë; ajo e trajtimit të problemeve të përditshme me zgjidhje konkrete, dhe e punës që nuk lë anash asnjë qytetar, asnjë lagje e asnjë fshat.”
Ai theksoi se në thelb të vizionit të tij për Prishtinën është bashkëpunimi dhe përfshirja: “Unë do të ofrojë bashkëpunim me secilin që ka ide të mira për kryeqytetin – jo si kryetar që vjen nga një parti, por si kryetar i të gjithë qytetarëve të Prishtinës.”
Në mbyllje, Ismaili dha një mesazh të fortë për ndryshim dhe përgjegjësi: “Është koha për një kryetar që nuk fshihet nga premtimet e veta, por i shërben qytetit me nder e me përgjegjësi. Dua që Prishtina të bëhet shembull i bashkëpunimit, i respektit, i punës, i mirësjelljes dhe i përkushtimit. Kjo ka qenë fushata ime, dhe kjo do të jetë qeverisja ime për Prishtinën.”