Kryetari i Lidhjes Demokratike të Kosovës, Lumir Abdixhiku, ka falënderuar qytetarët që mbështetën gjatë ditës së djeshme në votime përfaqësuesit e partisë që udhëheq.
Abdixhiku uroi edhe njëherë për fitoren Imri Ahmetin në Lipjan, Ilir Feratin në Istog e Ruzhdi Shehun në Junik teksa u kërkoi atyre që tashmë janë kryetarë të të gjithëve pa dallim e si të tillë duhet të sillen, njofton Dukagjini.
“Sot, disa e festojnë fitoren. Imriu, Iliri e Ruzhdiu festojnë me raund të parë. Festojmë për ta të gjithë. E merituat me punë, me durim e me besim. Urime për çdo sukses që e keni ndarë me qytetarët tuaj, për çdo fitore që është fitore e përbashkët e LDK-së dhe e gjithë Kosovës. Deri më sot keni qenë kandidat vetëm të LDK-së, nga sot e tutje jeni kryetarë të të gjithëve pa dallim. Silluni si të tillë”, ka shkruar Abdixhiku.
Tutje Abdixhiku ka shtuar se LDK-ja ka mbi 180 mijë vota për Kuvende Komunale dhe se sipas tij del partia e parë nga këto zgjedhje lokale.