Në disa Qendra Komunale të Numërimit, përfshirë Prishtinën, Podujevën dhe Kllokotin, procesi i numërimit të votave për asambletë komunale momentalisht nuk po zhvillohet.
Sipas zëdhënësit të Komisionit Qendror të Zgjedhjeve, Valmir Elezi, kjo është për shkak të rrjetit të dobët të internetit, i cili po pengon transmetimin e pamjeve në ekranet për vëzhguesit.
Në këto ekrane duhet të shfaqen pamjet nga kamera e vendosur në tavolinën e numërimit, ku prezantohen fletëvotimet, për t’u parë nga të gjithë.
Elezi ka siguruar se ekipet e KQZ-së po punojnë që ky problem të zgjidhet dhe procesi i numërimit të fillojë sa më shpejt edhe në këto qendra.
“Ekipet teknike të KQZ-së janë në terren dhe po punojnë për zgjidhjen e shpejtë të problemit”, thuhet nga KQZ-ja.
Ndër të tjera, procesi i numërimit të votave po vazhdon në Qendrat Komunale të Numërimit në Deçan, Gjakovë, Gllogoc, Gjilan, Dragash, Istog, Kaçanik, Klinë, Fushë Kosovë, Kamenicë, Mitrovicë e Jugut, Leposaviq, Lipjan, Novobërdë, Obiliq, Rahovec, Pejë, Prizren (me 6 grupe numërimi), Skenderaj, Shtime, Shtërpcë, Suharekë, Ferizaj, Viti, Vushtrri, Zubin Potok, Zveçan, Malishevë, Junik, Mamushë, Graçanicë, Ranillug, Partesh dhe Mitrovicë e Veriut.