Kryeministri i Shqipërisë, Edi Rama, ka reaguar pas kritikave të Lëvizjes Vetëvendosje lidhur me qëndrimin e tij për Gjykatën Speciale.
Në një postim në platformën X, Rama e ka quajtur reagimin e VV-së një “çarçaf të gjatë” dhe ka theksuar se, ndryshe nga ajo që pretendohet, ai ka denoncuar në mënyrë të vazhdueshme padrejtësitë ndaj ish-presidentit të Kosovës, Hashim Thaçi, dhe të tjerëve që po gjykohen në Hagë.
“Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro kurse ajo paska qenë kundër Gjykatës Speciale…
Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja dihet se sa ka lëvizur në atë drejtim. Por unë s’jam në asnjë lloj gare me Lëvizjen dhe më vjen keq që Lëvizja i ngatërron marrëdhëniet institucionale të Kosovës me Shqipërinë në çorbën e balotazheve komunale, ndërsa për qëndrimet e para 10 vjetëve – kur ajo nuk njihte as himnin e Kosovës e jo më pafajësinë e Hashim Thaçit, të cilin do ta donte përjetësisht në Hagë – i kujtoj Lëvizjes se Gjykata Speciale u ngrit për trafikun e organeve, jo për të marrë peng Presidentin e Republikës së Kosovës”, ka shkruar Rama.
Në fund të reagimit të tij, kryeministri shqiptar sqaroi se nuk është as organizator e as folës i protestës gjithëkombëtare “Drejtësi për Çlirimtarët”, megjithëse e mbështet plotësisht.
“Dhe e fundit, unë as nuk jam organizator e as nuk jam folës i protestës gjithëkombëtare “Drejtësi për Çlirimtarët”, të cilën e mbështes megjithë zemër e do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim me dashje ose jo i asaj nisme, do të dëmtonte qëllimin dhe popullaritetin e saj”, ka shkruar Rama.