Ende pa u mbyllur procesi i zgjedhjeve lokale, kanë nisur spekulimet nëse vendi do të hyjë edhe në një proces tjetër zgjedhor, por kësaj radhe për Kuvendin e Kosovës.
Deri më 26 tetor është afati kur mandatari për formimin e Qeverisë së re së dalë nga zgjedhjet e 9 shkurtit 2025, kryetari i Lëvizjes Vetëvendosje, Albin Kurti, duhet të paraqesë kabinetin e tij qeverisës dhe të votohet në Kuvend.
Nëse kjo nuk arrihet, atëherë vendi mund të shkojë në zgjedhje të reja për nivelin qendror për herë të dytë brenda një viti.
Zëdhënësi i KQZ-së, Valmir Elezi, ka thënë për KosovaPress, se ky institucion aktualisht është i përqendruar në përmbylljen e zgjedhjeve lokale dhe organizimin e raundit të dytë të zgjedhjeve për kryetarë të komunave.
Sipas tij, KQZ-ja nuk përfshihet në debatin politik mes subjekteve politike, por mbeten të përkushtuar për të përmbushur detyrimet kushtetuese.
Pavarësisht gatishmërisë në KQZ pranojnë se shkuarja në zgjedhje të reja në nivel qendror do të përbënte sfidë për stafin e këtij institucioni.
“Organizimi i një procesi të ri zgjedhor brenda një periudhe të shkurtër, sigurisht që përbën sfidë për KQZ-në dhe stafin e saj, veçanërisht për faktin se jemi ende në fazën aktive të administrimit të zgjedhjeve lokale. Por KQZ, si gjithmonë, do të veprojë në përputhje me mandatin e saj ligjor dhe do të ndërmarrë të gjitha veprimet e nevojshme nëse vendoset për mbajtjen e zgjedhjeve të reja”, tha Elezi.
Përndryshe, aktualisht janë duke u numëruar votat e diasporës dhe votat për disa kuvende komunale. Ndërsa, balotazhi për dhjetëra komuna do të mbahet më 9 nëntor.