Qeveria e Mbretërisë së Bashkuar është nikoqirja e sivjetme e samitit të Procesit të Berlinit me vendet e Ballkanit Perëndimor, i cili do të mbahet në Londër më 22 tetor për të promovuar bashkëpunimin rajonal dhe për të ofruar siguri dhe rritje.
Procesi i Berlinit është një platformë ndërkombëtare që bashkon qeveritë e gjashtë vendeve të Ballkanit Perëndimor, së bashku me partnerë të tjerë europianë. Qëllimi është të rrisë bashkëpunimin rajonal, të mbështesë zhvillimin ekonomik dhe të përshpejtojë përpjekjet e saj për një përafrim më të ngushtë europian në Ballkanin Perëndimor.
Qeveria e Mbretërisë së Bashkuar tha se derisa e zhvillon aleancën e saj strategjike me Europën, ajo do të punojë me Gjermaninë si iniciatore e Procesit të Berlinit mbi prioritetet e tyre të përbashkëta në Ballkanin Perëndimor.
Nga Kosova për të marrë pjesë në këtë samit drejt Londrës ka udhëtuar kryeministri në detyrë, Albin Kurti.
Mbretëria e Bashkuar listoi edhe synimet kryesore të samitit të këtij viti:
-të forcohet siguria europiane duke mbështetur aleatët e cenueshëm të NATO-s, duke kundërshtuar ndikimin armiqësor dhe faktorët që nxisin paqëndrueshmëri, duke ndërtuar komunitete rezistente, si dhe duke adresuar kërcënimet e përbashkëta që vijnë nga migracioni i parregullt, krimi i organizuar i rëndë dhe financimet e paligjshme
-të promovojë rritjen ekonomike duke zhbllokuar barrierat për tregtinë dhe investimet përmes bashkëpunimit të zgjeruar rajonal, duke mbështetur përafrimin europian dhe duke promovuar ekspertizën dhe mundësitë e investimit të Mbretërisë së Bashkuar të ofruara nga biznesi britanik dhe Financat e Eksportit të Mbretërisë së Bashkuar (UKEF).
Qeveria britanike tha se organizimi i këtij samiti këtë vit nga Mbretëria e Bashkuar bie në planet për ndryshim të kryeministrit britanik meqë përmes këtij Procesi synon të rrisë bashkëpunimin ndërkombëtar për të zvogëluar krimin e rëndë dhe të organizuar dhe migrimin e parregullt përgjatë rrugëve kryesore të tranzitit, të ndihmojë në sigurimin e kufijve të Mbretërisë së Bashkuar dhe të mbajë rrugët e saj të sigurta.
“Mbretëria e Bashkuar do të organizojë një sërë takimesh në nivel ministror që mbulojnë politikën e jashtme, të brendshme dhe ekonomike, duke kulmuar me një Samit të Liderëve të organizuar nga Kryeministri i Mbretërisë së Bashkuar në Londër më 22 tetor. Ngjarje të shumta anësore do të zhvillohen në muajt para Samitit, duke përfshirë forume mbi biznesin, shoqërinë civile, angazhimin e të rinjve dhe barazinë gjinore”, thuhet në njoftimin e qeverisë britanike.
E dërguara e posaçme e Mbretërisë së Bashkuar në Ballkanin Perëndimor, Dame Karen Pierce, është e emëruar në këtë post për të përmirësuar punën e Mbretërisë së Bashkuar me partnerët rajonalë, duke përfshirë zbatimin e Procesit të Berlinit.
Samitet e fundit të Liderëve janë mbajtur në Berlin, Gjermani (2024 dhe 2022) dhe në Tiranë, Shqipëri (2023).