Arben Fetoshi nga Instituti OCTOPUS në “Five” në RTV Dukagjini, ka thënë se deklarata e kryeministrit në detyrë, Albin Kurti, për “The Times”, se Kosova është e gatshme të pranojë azilkërkues në Kosovë – pra, ata që i ka refuzuar Londra zyrtare në këmbim të kushteve të sigurisë – është një lëvizje politike që përcjell vullnetin për bashkëpunim, bashkërëndim, koordinim dhe afirmim të aleancës së Kosovës me Mbretërinë e Bashkuar.
“Ashtu si edhe në të kaluarën, Kosova ka dëshmuar vullnetin që të jetë e hapur për mbështetje sipas kërkesave eventuale të aleatëve të tjerë evropianë… është një indikator i rëndësishëm i afirmimit të Kosovës në kuptim të kapaciteteve për marrje të përgjegjësive të caktuara në marrëdhëniet ndërkombëtare”, ka thënë ai.
Më tej, Fetoshi është shprehur se Mbretëria e Bashkuar është një prej partnerëve më të rëndësishëm strategjikë të Kosovës në rrafshin e sigurisë, jo vetëm në angazhimin e tyre në kuadër të KFOR-it, por edhe me mbështetje “eksplicite për Kosovën”.
“Me një mbështetje eksplicite për Kosovën në kontekstin e aktiviteteve hibride të Serbisë për ta minuar sovranitetin e Kosovës dhe për ta penguar atë në konsolidimin e vet ndërkombëtar”, ka thënë ai.
Ai tutje ka thënë se Londra mbetet faktori kyç dhe më i rëndësishëm i mbështetjes së Kosovës në kuptim të afirmimit të drejtës së saj për tu konsoliduar si aktor në skenën ndërkombëtare.