Liburn Aliu është emëruar drejtor i Portit të Durrësit, lajmi është konfirmuar nga ministrja e Arsimit në Shqipëri, Mirela Kumbaro, përmes një postimi në Facebook.
Kumbaro ka theksuar rëndësinë e Portit të Durrësit si “porta e përbashkët drejt Adriatikut për Shqipërinë dhe Kosovën”.
Ajo ka shtuar se Liburn Aliu është zgjedhja më e mirë për të përfaqësuar këtë vizion, duke e quajtur atdhetar dhe funksionar të sprovuar publik.
“Përherë e kemi thënë se Durrësi është porta e përbashkët drejt Adriatikut si për Shqipërinë dhe Kosovën, prandaj nuk mund të kishte zgjedhje më të mirë për ta mishëruar këtë vizion e ndjesi, se sa Liburni, një atdhetar dhe funksionar i sprovuar publik, me të cilin si ish-Ministre e Mjedisit kam pasur marrëdhënie të shkëlqyera bashkëpunimi gjatë kohës kur edhe ai drejtonte sektorët e mjedisit dhe planifikimit hapësinor si Ministër në Kosovë”, ka shkruar ajo në Facebook.
Liburn Aliu ka shërbyer më parë si ministër i Infrastrukturës në Qeverinë e Kosovës, post nga i cili dha dorëheqje pas emërimit të Dimal Bashës në krye të Kuvendit të Kosovës.