Një 14-vjeçar me origjinë nga Kosova, Len Fejzullahu, është bërë hero në Gjermani pasi rrezikoi jetën e tij për të shpëtuar shokun e shkollës nga një sulm brutal me çekiç.
Sipas raportimit të gazetës gjermane Friedberger Allgemeine, ngjarja ndodhi në qytetin Friedberg në mesin e tetorit, kur një 15-vjeçar sulmoi dy nxënës 14-vjeçarë në oborrin e shkollës, pak para fillimit të mësimit. Sulmuesi ishte i veshur me uniformë ushtarake dhe mbante një çekiç në dorë.
“Fillimisht mendova se ishte çekiç gome dhe se po bënin shaka,” ka rrëfyer Leni. Por shumë shpejt e kuptoi se situata ishte serioze. Sulmuesi e goditi shokun e tij në kokë, duke e lënduar rëndë, ndërsa kur iu drejtua Lenit, ky i fundit arriti ta shmangte goditjen dhe u plagos vetëm në krah.
“Isha i tmerruar, por nuk mund ta lija shokun tim vetëm,” ka treguar Leni. Ai u përball me sulmuesin, e goditi në këmbë dhe më pas ia mori çekiçin nga duart, duke e goditur në bark dhe e rrëzuar përtokë.
Falë ndërhyrjes së tij, dy të miturit arritën të shpëtonin dhe të vraponin drejt hyrjes së shkollës, ku kërkuan ndihmë. Dy mësimdhënës reaguan menjëherë, duke thirrur policinë dhe ambulancën.
Sulmuesi 15-vjeçar u arrestua në vendngjarje dhe po hetohet për tentimvrasje dhe lëndim të rëndë trupor. Autoritetet po shqyrtojnë gjithashtu mundësinë që rasti të ketë prapavijë ekstremiste, pasi adoleshenti kishte pasur më parë probleme me sjellje kërcënuese.
Leni ka dhënë dëshmi në polici dhe ka përgënjeshtruar zërat në rrjete sociale që e paraqisnin sulmuesin si viktimë bullizimi. “Nuk e kam njohur nga afër, vetëm si figurë. Po të ishte i huaj, komentet do të ishin krejt ndryshe,” ka thënë ai.
Sipas mediave gjermane, 14-vjeçari nga Kosova ka fituar respekt të madh për guximin e tij. Ai është ftuar nga kryebashkiaku i Friedbergut, Roland Eichmann, në një takim mirënjohjeje për aktin e tij heroik.