Pas spekulimeve për transferimin e mundshëm të Harry Kane te Barcelona, klubi katalanas po përballet me një tjetër çështje të rëndësishme – atë të mundësisë së largimit të trajnerit Hansi Flick në fund të sezonit.
Sipas mediumit spanjoll “Diario ABC”, trajneri gjerman, 60-vjeçar, ka shprehur prej muajit shtator dëshirën për t’u larguar, duke u ankuar se “është shumë i lodhur”. Këtë ndjenjë, Flick thuhet se e ka ndarë edhe me anëtarët e tjerë të stafit teknik.
Flick mori drejtimin e Barcelonës në verën e vitit 2024 dhe ka kontratë të vlefshme deri në vitin 2027, por sipas raportimeve, disa faktorë po e shtyjnë drejt dorëheqjes.
Ndër to përmenden mungesa e fokusit të lojtarëve, përkrahja e kufizuar nga drejtuesit e klubit dhe tolerimi i sjelljeve të superyllit të ri, 18-vjeçarit Lamine Yamal.
Nëse këto zëra rezultojnë të vërtetë, Barcelona mund të përballet me një tjetër krizë pas vetëm një sezoni me Flick në krye të skuadrës.