Komisioni Qendror i Zgjedhjeve ka bërë të ditur se Qendra e Numërimit dhe Rezultateve ka nisur procesin e vlerësimit dhe verifikimit të pakove të supozuara me fletëvotime, të cilat i takojnë votimit me postë jashtë Kosovës në raundin e dytë të zgjedhjeve lokale.
Siç bëhet e ditur në njoftimin e KQZ-së, gjatë ditës së martë dhe të mërkurë, nga kutitë postare të KQZ-së në 22 shtete të ndryshme të botës, janë tërhequr më shumë se 13,084 pako të tilla, njofton Dukagjini.
Tutje bëhet e ditur se para numërimit të fletëvotimeve nga votimi jashtë vendit, KQZ do të bëjë vlerësimin dhe verifikimin e tyre me qëllim të vërtetimit nëse këto pako janë dërguar nga shtetasit e Kosovës të regjistruar si votues jashtë Kosovës.
Në njoftimin e KQZ-së, po ashtu, bëhet e ditur se në QNR ka filluar punën edhe Komisioni i themeluar për vlerësimin e fletëvotimeve për zgjedhjet e raundit të dytë për kreytar në Mitrovicë të Jugut dhe Gjakovë të cilët do të përgatisin një raport deri më 14 nëntor.
“Po ashtu, gjatë ditës së enjte, në Qendrën e Numërimit dhe Rezultateve ka filluar punën Komisioni i themeluar nga KQZ për vlerësimin e fletëvotimeve për zgjedhjet e raundit të dytë për Kryetar të komunës së Mitrovicës së Jugut dhe Gjakovës. Planifikohet që ky Komision të përgatisë një raport deri më 14 nëntor. Ndërkaq, për komunat tjera ky vlerësim do të bëhet sipas mostrës së caktuar dhe raporti do të finalizohet deri në fund të javës. Puna e këtij komisioni do të jetë në funksion edhe të përgjigjes së kërkuar nga Paneli Zgjedhor për Ankesa dhe Parashtresa (PZAP) lidhur me një ankesë të parashtruar për raundin e dytë të zgjedhjeve për Kryetar të Komunës së Mitrovicës së Jugut, por njëkohësisht edhe të sqarimit të mëtejshëm të situatës së krijuar”, thuhet në njoftim.