Komisioni Qendror i Zgjedhjeve ka njoftuar se në Qendrën e Numërimit dhe Rezultateve ka filluar punën Komisioni i themeluar për vlerësimin e fletëvotimeve për zgjedhjet e raundit të dytë për kreytar në Mitrovicë të Jugut dhe Gjakovë.
Siç bëhet e ditur në njoftimin e KQZ-së, ky komision do të përgatisin një raport deri më 14 nëntor, njofton Dukagjini.
“Po ashtu, gjatë ditës së enjte, në Qendrën e Numërimit dhe Rezultateve ka filluar punën Komisioni i themeluar nga KQZ për vlerësimin e fletëvotimeve për zgjedhjet e raundit të dytë për Kryetar të komunës së Mitrovicës së Jugut dhe Gjakovës. Planifikohet që ky Komision të përgatisë një raport deri më 14 nëntor. Ndërkaq, për komunat tjera ky vlerësim do të bëhet sipas mostrës së caktuar dhe raporti do të finalizohet deri në fund të javës”, thuhet në njoftim.
Tutje bëhet e ditur se puna e këtij komisioni do të jetë në funksion edhe të përgjigjes së kërkuar nga Paneli Zgjedhor për Ankesa dhe Parashtresa (PZAP) lidhur me një ankesë të parashtruar për raundin e dytë të zgjedhjeve për Kryetar të Komunës së Mitrovicës së Jugut, por njëkohësisht edhe të sqarimit të mëtejshëm të situatës së krijuar.