Në mungesë të energjisë elektrike, dita për fermerin nga fshati Lubizhdë i Malishevës, Riza Morinën tash e 10 ditë po nisë ndryshe.
Gjëja e parë që i duhet të bëjë në mëngjes është të sigurojë naftë ashtu që gjeneratori, të ndizet për t’ia mundësuar rutinën e rregullt të punës.
Me mbi 100 krerë lopë, shpenzimet i janë dyfishuar e njëheri, edhe dëmet, me mijëra litra qumësht të çuar dëm.
“E kam agregatin 45 kilovat. Çdo ditë e kam shpenzu ka 40 litra në ditë, kam pas dëme të konsiderueshme në qumësht se frizi duhet të ketë rrymë, s’është kur dua unë me dhez po temperaturën e korigjon aj. Mbi 4 mijë litra mu ka desht mi hudh që janë dëme të konsiderushme”, ka thënë Rizah Morina – Fermer.
Një ditë më parë, banorët e Lubizhdës protestuan para zyrave të KEDS-it në Malishevë, në thirrje për sanimin e problemit.
Por sipas kryetarit të fshatit, ata hasën në vesh të shurdhër.
“Arsyetimi i vetëm është që nuk kemi mundësi me intervenu kurgjo hiç. Unë gjeneratë e re jam mundem mos me mbajt men luftën po e di që edhe në luftë s’ka ndodhë mos me pas rrymë në 24 orë”, ka thënë Zejadin Paçarizi – Kryetar i fshatit Lubizhdë.
Të zhgënjyer shprehen edhe mërgimtarët që thonë se atdheu iu ngjan me vitet e 90-ta.
“Po më doket, Albini e ka kthy kohën e 98-tës pa rrymë, trafon e kanë pru me bo hajgare këtu. Kot shko në Malishevë, pos me kanë të Serbisë të presin ata të KEDS-it”, ka thënë Agron Morina – Mërgimtar nga Italia.
Shqetësime rreth situatës aktuale në Malishevë ka shprehur edhe kryetari i kësaj të fundit, Ekrem Kastrati i cili ka kërkuar ndërmarrjen e veprimeve emergjente si nga Qeveria në detyrë, ashtu edhe nga KEDS-i.
I bëjmë thirrje Qeverisë së Republikës së Kosovës që të trajtojë me prioritet situatën energjetike në Komunën e Malishevës dhe të ndërmarrë masa konkrete për furnizim të qëndrueshëm me energji elektrike për qytetarët e komunës së Malishevës. Po ashtu, edhe nga KEDS dhe KESCO kërkojmë që të ofrojnë sqarime të qarta për arsyet e këtyre ndërprerjeve, si dhe të sigurojnë intervenime urgjente teknike për evitimin e mungesës së energjisë elektrike në komunën tonë! -Ekrem Kastrati, Kryetar i Malishevës
Televizioni Dukagjini ka pyetur për këto probleme në KEDS dhe kur pritet të rregullohen reduktimet e ashpra por ky institucion nuk ka kthyer përgjigje.