I vendosur mbi një kodër të qetë mbi bregdetin verior të Shqipërisë, ky penthouse i jashtëzakonshëm ofron pamje panoramike mbresëlënëse drejt Ranës së Hedhun dhe Detit Adriatik, një zonë e njohur për perëndimet spektakolare të diellit, ku qielli shndërrohet në nuanca ari, rozë dhe qelibar teksa dita i lë vendin mbrëmjes.
I konceptuar nga arkitekti me famë ndërkombëtare Chris Precht, rezidenca ndërthur qartësinë skulpturore me forma organike, duke krijuar një shprehje arkitekturore që është njëkohësisht e qetë dhe thellësisht e lidhur me natyrën përreth, shkruan Forbes Global, transmeton Dukagjini.
Në brendësi, 243 m² hapësirë banimi elegante shpalosen përmes linjave fluide, materialeve natyrore dhe hapjeve të mëdha harkore, të cilat kornizojnë pamje të pandërprera të dunave, detit dhe qiellit. Me katër dhoma gjumi dhe katër banjo, organizimi i hapësirës thekson qetësinë, komoditetin dhe një ndërveprim të vazhdueshëm me ambientin natyror.
Një terasë private prej 350 m² e zgjeron jetesën në ambient të hapur, duke krijuar një peizazh të skalitur ideal për relaks, ngrënie dhe përjetimin e perëndimeve të paharrueshme të Shëngjinit.
Penthouse-i është pjesë e një komuniteti vizionar bregdetar, i projektuar me ndjeshmëri ekologjike dhe planifikim të kujdesshëm. Ruajtja e relievit natyror, përdorimi i materialeve autentike dhe arkitektura e orientuar nga peizazhi krijojnë një atmosferë diskrete dhe jetesë të rafinuar. Banorët përfitojnë nga shtigje këmbësorësh, parkim nëntokësor, oborre të gjelbëruara, si dhe nga pishina spektakolare në shkëmb, e gdhendur drejtpërdrejt në reliev – një element arkitekturor ikonik që ka tërhequr tashmë vëmendje ndërkombëtare.
I gjithë projekti është aktualisht në ndërtim e sipër dhe po avancon me ritëm të qëndrueshëm, me përfundim të planifikuar në fillim të vitit 2028. Ky afat u jep blerësve mundësinë të sigurojnë një rezidencë në atë që pritet të bëhet një nga destinacionet më të rëndësishme arkitekturore dhe të stilit të jetesës në bregdetin verior.
Përtej vlerave të dizajnit dhe jetesës luksoze, kjo rezidencë qëndron në ballë të fazës së re të zhvillimit bregdetar të Shqipërisë. Ndërsa vendi ofron disa nga plazhet më të bukura dhe ende të pazbuluara të Mesdheut, zhvillimi deri më tani ka qenë i përqendruar kryesisht në Rivierën e Jugut. Kjo shtëpi është pjesë e projektit të parë të madh luksoz në bregdetin verior, duke e pozicionuar atë si një pikënisje të një kapitulli të ri për rajonin.
Ky zhvillim përforcohet edhe nga investimet infrastrukturore. Bypass-i i ri i Shëngjinit do të reduktojë kohën e udhëtimit nga Aeroporti Ndërkombëtar i Tiranës nga rreth 1 orë e 20 minuta në vetëm 45 minuta, duke e bërë pronën lehtësisht të aksesueshme nga qendrat ndërkombëtare dhe duke rritur potencialin e saj afatgjatë si investim.
Me arkitekturë skulpturore, pamje filmike të perëndimeve të diellit dhe një pozicionim strategjik si pionier në një bregdet luksoz në zhvillim, ky penthouse ofron një ndërthurje të rrallë të bukurisë, qetësisë dhe vlerës strategjike.
