Instituti Hidrometeorologjik i Kosovës (IHMK) ka bërë të ditur se pas reshjeve rekorde që përfshinë pothuajse të gjithë territorin e vendit, situata meteorologjike është stabilizuar sa i përket reshjeve.
Sipas IHMK-së, dita e martë do të karakterizohet nga mot kryesisht i vranët, si pasojë e depërtimit të masave të ftohta ajrore që kanë përfshirë Kosovën.
Temperaturat minimale në mëngjes pritet të zbresin nga -12 deri në -7 gradë Celsius, ndërsa ato maksimale gjatë ditës do të lëvizin nga -2 deri në 2 gradë Celsius.
Era do të fryjë nga veriperëndimi, me shpejtësi prej 1 deri në 5 metra për sekondë.
IHMK paralajmëron se mëngjeset do të jenë shumë të ftohta, me ngrica të theksuara, ndërsa në disa zona mund të ketë edhe mjegull. Si pasojë, këshillohet kujdes i shtuar për pjesëmarrësit në trafik.