Pas vendimit të Komisionit Qendror të Zgjedhjeve që të rinumërohen prap gati 900 mijë vota, jo të partive por të kandidatëve, procesi në Qendrën e Numërimit dhe Rezultateve është në vlugun e punës.
Nga 13 janari kur nisi procesi, fillimisht një pjesë e më pas të gjitha kutitë nga 2557 vendvotime u sollën këtu në qendër për t’i rinumëruar votat dhe deri në orët e pasdites, u numëruan mbi 27%.
Nga rreth 40 persona në ekipet e numërimit sa ishin, tash stafi është dyfishuar.
“Gjatë një ditë pune nga ora 8 e mëngjesit deri në mesnatë është 76 ekipe numërimi, bazuar në këtë kapacitet dhe në numrin e vendvotimeve të mbetura për t’i numëruar planifikojmë që procesi i ri-numërimit të përmbyllet deri në fund të këtij muaji, pra deri në fund të janarit”, ka thënë zëdhënsi i KQZ-së, Valmir Elezi.
Pas përfundimit të ri-numërimit dhe shpalljes së rezultateve përfundimtare i hapet rrugë periudhës së ankesave në PZAP, eventualisht pastaj në Gjykatën Supreme, për të e përmbyllur përfundimisht këtë proces me certifikim të rezultateve.
Nga Instituti i Kosovës për Drejtësi vlerësojnë se përpos dëmeve që shpërputhja e votave mund të ia bëjë integrititet të procesit zgjedhor, sfidues mund të jenë edhe afatet e formimit të institucioneve, për shkak të domosdoshmërisë së zgjedhjes së presidentit të ri jo më vonë se data 4 mars.
“Megjithatë tashmë është më lehtë sepse kemi një subjekt që ka fituar një shumcë të madhe të votave dhe se formimi i numrit 61 është i lehtë mirëpo presim dhe shpresojmë që deputetët të mos abuzojnë e sidomos partia më e madhe të mos abuzojë me të drejtën që i kanë dhënë me të drejtën për t’i formuar institucionet për shkak të interesave partiake, interesave të ngushta”, ka thënë Melos Kolshi nga IKD.
Neni 105 dhe 106 i ligjit për Zgjedhje e Përgjithshme flasin për afatet për ankesat e palëve në PZAP dhe në Gjykatën Supreme, përfshirë edhe periudhën kur duhet të kthejnë përgjigja.
Nëse ka ankesa dhe nëse edhe PZAP dhe Supremja i shfrytëzojnë maksimalisht afatet ligjore të lejuara, përfundimisht rezultate mund të certifikohen, maksiumumi 13 ditë pas përfundimit të numërimit të votave, rrjedhimisht i bie në javën e dytë të muajit shkurt.