Korporata Energjetike e Kosovës (KEK sh.a.) ka njoftuar se Njësia A5 është ndalur nga operimi rreth orës 20:25, si pasojë e një rrjedhjeje të evidentuar në ekranet (sistemin gypor), në kuotën 10–15 metra.
Sipas KEK-ut, ndalja e njësisë është realizuar në përputhje të plotë me standardet teknike dhe operative të sigurisë, me qëllim të parandalimit të defekteve potenciale më të mëdha dhe për të mundësuar kryerjen e sanimeve të nevojshme teknike.
Aktualisht, KEK sh.a. po vazhdon operimin sipas planit dhe Bilancit të Energjisë Elektrike, me katër njësi prodhuese në operim: A3, A4, B1 dhe B2. Nga korporata sqarojnë se, në kushte të zakonshme, operimi bëhet me katër njësi, ndërsa gjatë periudhave me temperatura të ulëta është bërë angazhim maksimal për të vënë në funksion edhe njësinë e pestë, duke arritur për një periudhë operimin me pesë njësi njëkohësisht.
KEK sh.a. thekson se mbetet e përkushtuar ndaj operimit të sigurt, stabil dhe efikas të kapaciteteve prodhuese, përmes zbatimit të masave parandaluese dhe mirëmbajtëse, me synim garantimin e stabilitetit të sistemit elektroenergjetik të vendit.