Këshilltari i Presidentes së Kosovës, Vjosa Osmani, Rinor Nuhiu, ka njoftuar se po shqyrtohen hapa ligjorë ndaj gazetarit të “Frankfurter Allgemeine Zeitung”, Michael Martens, pas një shkrimi të publikuar të mërkurën.
Sipas Nuhiut, artikulli përmban pretendime shpifëse dhe të pabaza, duke përhapur dezinformata mbi presidenten.
Në shkrim, Martens kishte pretenduar se Osmani po përpiqet të sigurojë një mandat të ri presidencial duke u mbështetur në përkrahjen amerikane dhe duke u quajtur “kandidate e Trumpit”.
“Presidentja Osmani i hedh poshtë kategorikisht këto pretendime shpifëse dhe përhapjen e rrezikshme të dezinformimit. Janë duke u shqyrtuar të gjitha mjetet ligjore për mbrojtjen e integritetit të institucionit dhe të shtetit që ajo përfaqëson”, ka shkruar Nuhiu në platformën X.