Avokati i Kadri Veselit, Rodney Dixon, deklaroi se klienti i tij duhet shpallur i pafajshëm për të gjitha akuzat.
Dixon vlerëson se gjykata nuk mund të shpallë fajtor një person, nëse kjo shpallje fajësie mbështetet mbi prova të patestuara dhe thashetheme, njofton Dukagjini.
“ZPS-ja kur foli të hënën foli shumë pak për zotëri Veselin, deri në momentin kur nga fundi, zotëri Howling iu rikthye trillimit të ZPS-së, të ligjeve dhe fakteve për një përpjekje të fundit për të përfshirë zotëri Veselin. Sipas nesh, deri në këto momente nuk u tha asgjë madje edhe kur thanë, thanë fjalë boshe”.
“Asgjë deri në fund të fjalës së ZPS-së, sepse nuk kanë asnjë përgjigje për akuzat që ngritëm ne sa i takon argumenteve të tyre ndaj zotëri Veselit. Por sidoqoftë, ata pretendojnë se ne nuk kemi trajtuar themelësinë e akuzave të ZPS-së. Është akuzë e rëndë kjo. Sepse ajo që bëmë ne javën e kaluar, ishte trajtimi i të gjitha akuzave, një nga një, të paraqitura nga ZPS”, deklaroi Dixon.
Mes tjerash, Dixon shtoi se mbrojtja mbështetet tek të drejtat më themelore që duhet të respektohen në çdo proces penal, duke theksuar se provat duhet të testohen ndaj të akuzuarve.
“Mbrojtja mbështetet në të drejtat më themelore që duhen të jenë në çdo gjykim penal, pra e thënë shkurt, të testohen provat ndaj të akuzuarve. ZPS-ja po përpiqet të shfrytëzojë pikërisht fillin e artë të të drejtës penale për të lidhur klientin tim. Ky parim ligjor është i padiskutueshëm, gjykata nuk mund të shpall fajësinë për një person, nëse kjo shpallje fajësie do të mbështetet vetëm mbi prova të patestuara dhe thashetheme”, u shpreh ai.