Kryeministri izraelit, Benjamin Netanyahu, gjatë një vizite në Qendrën Kombëtare të Komandës së Shëndetësisë, deklaroi se lufta e Izraelit kundër Iranit “ende nuk ka përfunduar”, raporton AFP.
“Synimi ynë është t’i ndihmojmë iranianët të heqin qafën e tiranisë; në fund, kjo varet nga vetë ata. Por nuk ka dyshim se me veprimet e ndërmarra deri tani, po u thyhen eshtrat – dhe ende nuk kemi përfunduar”, ka deklaruar Netanyahu.
Ushtria izraelite ka paralajmëruar se do të synojë infrastrukturën e Hezbollah në zonën e Tyre dhe Sidon në bregun perëndimor të Libanit jugor.
Po ashtu, ushtria ka paralajmëruar veprime edhe në jug të lumit Litani, rreth 74 kilometra larg kryeqytetit Beirut.
Zëdhënësi i ushtrisë izraelite, Avichay Adraee, rikujtoi urdhrat për evakuim dhe kërkoi nga banorët e të gjitha këtyre zonave që të largohen.
Në 24 orët e fundit, 191 persona në Izrael janë pranuar në spital për lëndime të lidhura me luftën SHBA-Izrael kundër Iranit, sipas Ministrisë së Shëndetësisë izraelite. Njëri është në gjendje kritike, tre me lëndime të rënda, dy me lëndime të moderuara dhe 172 me lëndime të lehta, ndërsa 10 u pranuan për ankth dhe tre për vlerësim mjekësor, raporton The Guardian.
Që nga fillimi i konfliktit, gjithsej 2,339 persona janë pranuar në spitale për lëndime, nga të cilët 95 mbeten të shtruar.