Kryeministri i vendit, Albin Kurti, ka përkujtuar sot 27-vjetorin e masakrës së Lubizhdës së Hasit, duke rikujtuar krimet e kryera nga forcat serbe ndaj civilëve shqiptarë gjatë luftës në Kosovë.
Kurti kujtoi edhe rrëfimet e të mbijetuarve, të cilët kanë dëshmuar për barbarinë e krimit, që përfshinte ekzekutime të planifikuara, tortura, keqtrajtime, plaçkitje, dhunime dhe dëbime, si dhe shkatërrim të pronave, njofton Dukagjini.
“Si sot, 27 vite më parë, më 12 prill të vitit 1999, forca të shumta të Batalionit të Dytë të Motorizuar 549 të ushtrisë jugosllave, i rrethuan malet ku ishin strehuar shumë nga banorët e fshatit Lubizhdë të Hasit. Pasi i ndanë burrat nga gratë dhe fëmijët e tyre, ushtarët serbë filluan t’i torturonin teksa i radhitën në rresht për t’i pushkatuar. Të mbijetuarit e kësaj masakre, kanë rrëfyer pastaj barbarinë e këtij krimi shtetëror të Serbisë ndaj banorëve të Lubizhdës së Hasit, përshkuar nga ekzekutime të planifikuara, tortura, malltretime, plaçkitje, dhunime, dëbime dhe shkatërrim pronash”, ka shkruar Kurti.
Kurti thekson se prilli i vitit 1999 qe koha kur një nga fushatat kriminale të spastrimit etnik dhe gjenocidit serb u shtri mbi Kosovën, duke lënë të vrarë 40 civilë shqiptarë të paarmatosur.
“Gjatë atyre ditëve të mesit të prillit të vitit 1999, nga fushatat kriminale të spastrimit etnik dhe gjenocidit që Serbia po kryente ndaj shqiptarëve në Kosovë, u vranë 40 civilë shqiptarë të paarmatosur. Ndërkaq, në përballje me forcat serbe dhe në mbrojtje të civilëve, ranë dëshmorë 14 luftëtarë të Ushtrisë Çlirimtare të Kosovës. Jetët e dhëna për çlirimin e Kosovës janë vlerë sublime në themelet e lirisë së popullit dhe shtetndërtimit të republikës sonë. Lavdi dëshmorëve dhe martirëve të rënë për lirinë e atdheut!”, ka shkruar Kurti.