Mitch Winehouse, babai i këngëtares së ndjerë Amy Winehouse, ka humbur një çështje në Gjykatën e Lartë kundër dy miqve të vajzës së tij, të cilat ai i akuzonte për përfitim nga shitja e sendeve personale të saj në ankande në Shtetet e Bashkuara të Amerikës.
Ai kishte ngritur padi ndaj Naomi Parry dhe Catriona Gourlay, duke pretenduar se ato kishin fshehur qëllimisht shitjen e dhjetëra objekteve që i përkisnin këngëtares. Sipas avokatëve të tij, kjo ishte arsyeja pse ai iu drejtua gjykatës, si mënyra e vetme për të marrë përgjigje.
Megjithatë, zëvendësgjyqtarja e Gjykatës së Lartë, Sarah Clarke KC, vendosi kundër tij, duke theksuar se Winehouse mund të kishte identifikuar sendet e kontestuara me një kujdes të arsyeshëm.
Nga ana tjetër, avokatët e Parry dhe Gourlay argumentuan se sendet ose u ishin dhënë atyre nga vetë Amy Winehouse, ose u përkisnin atyre. Gjykata mori parasysh edhe dëshmi që përshkruanin bujarinë e këngëtares, duke theksuar se ajo shpesh u jepte rroba dhe sende miqve të saj të afërt, pasi nuk preferonte të vishej më shumë se një herë me të njëjtën veshje në publik.
Në një deklaratë të lexuar në gjykatë, Naomi Parry tha se marrëdhënia e saj me Amy Winehouse ishte ndërtuar mbi besim, besnikëri dhe dashuri për punën, ndërsa theksoi se fokusi i saj aktual është rindërtimi i jetës dhe karrierës, si dhe mbrojtja e emrit dhe trashëgimisë së këngëtares.
Amy Winehouse, fituese e çmimeve Grammy dhe e njohur për hitet “Rehab” dhe “Back to Black”, ndërroi jetë në vitin 2011 në moshën 27-vjeçare.