Këshilli Prokurorial i Kosovës (KPK) ka shprehur shqetësimin e tij, lidhur me dyshimet e ngritura në media për shpërndarjen e pyetjeve të testit për bashkëpunëtorë profesionalë nga Kryeprokurori i Prokurorisë Themelore në Gjakovë, Ramiz Buzhala.
Përmes një komunikate, KPK-ja ka treguar se konkursi për rekrutimin e bashkëpunëtorëve profesionalë për prokuroritë themelore në Gjakovë, Pejë dhe Prizren do të anulohet.
“U.D Drejtori i Përgjithshëm i Sekretariatit të Këshillit Prokurorial të Kosovës, njofton opinionin publik se do të anulohet në tërësi konkursi për rekrutimin e bashkëpunëtorëve profesionaël për prokuroritë themelore në Gjakovë, Pejë dhe Prizren duke e kthyer atë në pikën zero”, thuhet në komunikatë.
Bëhet e ditur se, ushtruesi i detyrës së Drejtorit të Përgjithshëm të Sekretariatit të Këshillit Prokurorial të Kosovës, në bazë të autorizimeve të tij, do t’i ndërmarrë veprimet e nevojshme ligjore ndaj anëtarëve të komisionit të këtij procesi.
Ndryshe të mërkurën e 13 korrikut, Zyra e Kryeprokurorit të Shtetit ka njoftuar opinionin publik se Ushtruesi i Detyrës së Kryeprokurorit të Shtetit, Besim Kelmendi, pas pranimit të informacionit nga mediat lidhur me dyshimet e ngritura për shpërndarje të pyetjeve të testit për bashkëpunëtorë profesionalë nga Kryeprokurori i Prokurorisë Themelore në Gjakovë, Ramiz Buzhala, në bazë të kompetencave që ka, do t’i ndërmarrë të gjitha veprimet e nevojshme sipas legjislacionit në fuqi.
Zyra e Kryeprokurorit: Do t’i marrim të gjitha veprimet e nevojshme për dyshimet ndaj Ramiz Buzhalës