Liderët e vendeve të G7 do të mblidhen nga e hëna në qytetin Evian-les-Bains të Francës për samitin vjetor, ku ndër temat kryesore do të jetë marrëveshja kornizë e arritur mes Shteteve të Bashkuara dhe Iranit.
Megjithëse marrëveshja pritet të nënshkruhet zyrtarisht të premten, liderët e G7-së pritet t’i kërkojnë presidentit amerikan Donald Trump më shumë detaje rreth përmbajtjes së saj, me fokus të veçantë te rihapja e Ngushticës së Hormuzit, një prej rrugëve më të rëndësishme të transportit të naftës në botë.
Presidenti francez Emmanuel Macron ka bërë të ditur se në samit do të diskutohet edhe mbështetja për Libanin në kuadër të marrëveshjes së re.
G7 përbëhet nga Shtetet e Bashkuara, Britania e Madhe, Kanadaja, Franca, Gjermania, Italia dhe Japonia. Në samit do të marrë pjesë edhe Bashkimi Evropian, megjithëse nuk konsiderohet një nga shtatë anëtarët kryesorë pasi përfaqëson një bllok shtetesh.
Në agjendën e samitit do të jenë gjithashtu lufta në Ukrainë, mbështetja për Kievin përballë agresionit rus dhe zhvillimet e fundit në fushën e inteligjencës artificiale.