Tetë persona, përfshirë dy punonjës të kompanisë Boeing, kanë humbur jetën pasi një bombardues amerikan B-52 u rrëzua menjëherë pas ngritjes nga baza ajrore Edwards Air Force Base në Kaliforninë jugore.
Aksidenti ndodhi të hënën në orën 11:20 me kohë lokale (19:20 GMT), gjatë një misioni testues rutinë. Sipas autoriteteve, përplasja shkaktoi një re të madhe tymi të zi që u pa nga distanca të mëdha.
Koloneli James Hayes deklaroi se bëhet fjalë për “një tragjedi të rëndë”, duke konfirmuar se viktimat përfshijnë një “ekuipazh të përzier me personel ushtarak, civilë qeveritarë dhe kontraktorë”.
Sipas tij, të gjitha indikacionet fillestare tregojnë se përplasja “nuk ishte e mbijetueshme”, ndërsa trupat e viktimave janë në proces identifikimi dhe familjet e tyre po njoftohen, raporton BBC.
Autoritetet konfirmuan se avioni u rrëzua menjëherë pas ngritjes dhe u përfshi nga flakët në pistë. Zona e incidentit është “plotësisht e izoluar” brenda bazës ajrore, ndërsa operacionet janë pezulluar përkohësisht.
B-52 ishte duke marrë pjesë në programin e modernizimit të radarëve të bazës, ndërsa ende nuk është përcaktuar shkaku i saktë i aksidentit. Hetimet fillestare pritet të zgjasin deri në 30 ditë, ndërsa analiza më të thelluara mund të marrin mbi gjashtë muaj.
Boeing konfirmoi se dy nga punonjësit e saj ishin në bord dhe shprehu ngushëllime për familjet e viktimave.
Guvernatori i Kalifornisë, Gavin Newsom, e cilësoi ngjarjen si “tragjedi të rëndë” dhe shprehu ngushëllime për komunitetin e bazës dhe familjet e viktimave.
Pamjet ajrore treguan një zonë të djegur dhe të mbuluar nga tymi i dendur në vendin e përplasjes. Baza ka ndaluar përkohësisht fluturimet hyrëse dhe ka pezulluar lejet për vizitorët deri në njoftim të ri, për t’u fokusuar në operacionet emergjente.