Ambasadori i nominuar i Shteteve të Bashkuara për Shqipërinë, Eric Wendt, ka marrë miratimin përfundimtar nga Senati amerikan, pasi u konfirmua me 51 vota pro dhe 47 kundër.
Votimi u zhvillua në seancë plenare, pas aprovimit paraprak të kandidaturës së tij në komisionin përkatës të Senatit. Më herët, Komiteti për Marrëdhëniet me Jashtë i Senatit kishte mbështetur emërimin e tij me 19 vota pro dhe tri kundër, duke i hapur rrugën procedurës finale të konfirmimit.
Me përfundimin e procesit në Senat, Wendt pritet të marrë detyrën e ambasadorit në Shqipëri në ditët në vijim, në përputhje me afatet e administratës amerikane, raportoi “Euronews Albania”.
Wendt sjell një përvojë të gjatë në fushën ushtarake dhe të sigurisë ndërkombëtare. Ai është oficer i pensionuar i Ushtrisë së SHBA-së me mbi 34 vjet shërbim dhe ka mbajtur disa pozita të rëndësishme gjatë karrierës së tij.
Ndër të tjera, ai ka shërbyer si komandant i Komandës së Operacioneve Speciale të NATO-s, si dhe në role të larta drejtuese në Lindjen e Mesme dhe rajonin e Paqësorit.
Në periudhën 2017–2019, Wendt ishte Koordinator i Sigurisë i SHBA-së për Autoritetin Izraelito-Palestinez, ndërsa më pas shërbeu edhe si shef i Shtabit në Komandën e Paqësorit të Shteteve të Bashkuara.
Ai është diplomuar në Universitetin e Kalifornisë në Santa Barbara dhe ka përfunduar studime pasuniversitare në fushën e sigurisë kombëtare.