Historiani dhe profesori, Durim Abdullahu ka reaguar pas dëshmive të dhëna në gjykatë nga disa gra shqiptare, në procesin ndaj ish-gardianes serbe Nadica Cepkenoviq, e akuzuar për krime lufte dhe tortura në burgun e Lipjanit gjatë viteve 1998–1999.
Në një postim në Facebook, Abdullahu ka vlerësuar mënyrën dinjitoze të dëshmive të të mbijetuarave, duke i cilësuar ato si të qeta, njerëzore dhe të përkushtuara ndaj kërkesës për drejtësi, pa thirrje për hakmarrje.
“Thellësisht e admirueshme mënyra aq dinjitoze, njerëzore dhe qytetëruese e këtyre grave shqiptare, që dëshmuan sot në gjyq kundër gardianes serbe Nadica Cepkenoviq, e akuzuar për tortura dhe krime lufte ndaj të burgosurave shqiptare në burgun e Lipjanit, më 1998 dhe 1999. Zahrije Podrimqaku Subashi, Jehona Krasniqi Morina dhe Mevlyde Saraqi dëshmuan për dhunën dhe torturat e ushtruara ndaj tyre nga gardianja Cepkenoviq, duke kërkuar drejtësi dhe jo hakmarrje, madje duke u shprehur me plot besim te vlerat demokratike dhe një proces i drejtë gjyqësor që shteti i tyre Republika e Kosovës, do t’ia siguroj persekutores së tyre”, ka shkruar ai.
Ai ka theksuar se dëshmitë përfaqësojnë një përballje të dhimbshme me të kaluarën e luftës dhe ka folur për rëndësinë e procesit gjyqësor në ndriçimin e krimeve të pretenduara gjatë luftës në Kosovë.
Abdullahu ka shtuar se drejtësia duhet të jetë e bazuar në vlera demokratike dhe një proces të drejtë gjyqësor për të gjitha palët e përfshira.