Partia Demokratike e Kosovës ka reaguar pas dështimit të seancës së sotme për konstituimin e Kuvendit të Republikës së Kosovës, duke shprehur shqetësim për vazhdimin e bllokadës institucionale.
Në një komunikatë për media, PDK-ja vlerëson se moskonstituimi i Kuvendit përbën vazhdim të bllokadës nga ana e kryetarit të Lëvizjes Vetëvendosje, Albin Kurti, duke e cilësuar këtë si veprim në kundërshtim me frymën dhe detyrimet që burojnë nga aktgjykimi i Gjykatës Kushtetuese, njofton Dukagjini.
Sipas PDK-së, seanca e sotme tregoi se zvarritja e krijimit të institucioneve nuk lidhet me mungesë votash apo me rrethana të tjera objektive, por është rezultat i një zgjedhjeje politike të Vetëvendosjes dhe të Albin Kurtit.
“Seanca e sotme dëshmoi qartë se zvarritja e krijimit të institucioneve nuk është pasojë e rrethanave apo e mungesës së votave, por rezultat i një zgjedhjeje politike të Lëvizjes Vetëvendosje dhe Albin Kurtit. Sot nuk kishte asnjë arsye që të mos propozohej kandidati për Kryetar të Kuvendit dhe të procedohej me votimin për konstituimin e tij. Aq më tepër kur Gjykata Kushtetuese ka qenë e qartë në aktgjykimin e saj se Kuvendi jo vetëm duhet të mblidhet, por duhet të konstituohet brenda afatit 30-ditor nga certifikimi i rezultateve të zgjedhjeve. Mosveprimi i sotëm përbën shpërfillje të drejtpërdrejtë të rendit kushtetues dhe të detyrimeve që burojnë nga vendimi i Gjykatës Kushtetuese. Askush nuk është mbi Kushtetutën dhe askush nuk ka të drejtë të mbajë peng institucionet e Republikës për interesa partiake”, thuhet në reagimin e PDK-së.
Mes tjerash, PDK-ja rithekson se vendi ka nevojë urgjente për institucione funksionale, stabilitet politik dhe respektim të plotë të Kushtetutës.
PDK i bëri thirrje Lëvizjes Vetëvendosje dhe Albin Kurtit që të respektojnë aktgjykimin e Gjykatës Kushtetuese, të heqin dorë nga ajo që e quajti bllokadë institucionale dhe të mundësojnë menjëherë konstituimin e Kuvendit të Republikës së Kosovës.