Kuvendi i Kosovës do të hapë dyert për bashkatdhetarët nga diaspora duke filluar nga e hëna deri të mërkurën, në kuadër të aktivitetit “Bashkatdhetarët në Kuvend”.
Sipas njoftimit të Kuvendit, qytetarët nga diaspora do të mund ta vizitojnë institucionin nga ora 12:00 deri në 16:00.
Aktiviteti zhvillohet në një kohë kur Kuvendi vazhdon të jetë i pakonstituuar, pasi deputetët nuk kanë arritur ta përmbyllin këtë proces brenda afatit prej 30 ditësh nga certifikimi i rezultateve të zgjedhjeve, siç përcaktohet në aktgjykimin e Gjykatës Kushtetuese të vitit të kaluar.
Në seancën e fundit, lideri i Lëvizjes Vetëvendosje dhe kryeministri në detyrë, Albin Kurti, kërkoi sërish kohë shtesë për të arritur një marrëveshje me partitë e tjera politike për tejkalimin e ngërçit.
Kjo kërkesë shkaktoi tensione në sallën e Kuvendit.
Pas fjalimit të Kurtit, deputetja e Aleancës për Ardhmërinë e Kosovës, Time Kadrijaj, e qëlloi atë me vezë, ndërsa situata u ndërpre nga ndërhyrja e sigurimit.
Ndërkohë, ende nuk është caktuar data për vazhdimin e seancës konstituive të Kuvendit.
Kështu, përderisa Kuvendi këtë javë pret të mirëpresë bashkatdhetarët, mbetet i paqartë edhe hapi i radhës për zhbllokimin e procesit të konstituimit të legjislativit.