Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim senatoren amerikane për shtetin e Ajovës, Joni K. Ernst.
Në takim, Jashari e ka falënderuar senatoren Ernst për vizitën dhe për mbështetjen e vazhdueshme të Shteteve të Bashkuara të Amerikës ndaj Kosovës dhe FSK-së.
“E falënderoj senatoren Ernst për vizitën dhe për mbështetjen e vazhdueshme të Shteteve të Bashkuara të Amerikës ndaj Republikës së Kosovës dhe Forcës së Sigurisë së Kosovës”, thuhet në njoftimin e FSK-së.
Gjatë takimit është diskutuar për zhvillimet aktuale dhe të ardhmen e FSK-së, prioritetet e saj, si dhe për rëndësinë e vazhdimit të bashkëpunimit me SHBA-në.
“Bashkëpunimi i vazhdueshëm me Shtetet e Bashkuara të Amerikës është i një rëndësie të veçantë për zhvillimin dhe forcimin e kapaciteteve të FSK-së”, thuhet më tej në njoftim.
Palët kanë diskutuar edhe për zhvillimet e fundit në fushën e sigurisë dhe sfidat e përbashkëta.
Në përfundim të takimit, Jashari ka shprehur mirënjohje për senatoren Ernst për kontributin e saj në forcimin e marrëdhënieve ndërmjet Kosovës dhe SHBA-së.
“Thellimi i mëtejshëm i partneritetit dhe marrëdhënieve bilaterale në fushën e mbrojtjes dhe sigurisë mbetet i një rëndësie të veçantë për Republikën e Kosovës”, thuhet në njoftim.
Senatorja Ernst ishte e shoqëruar nga e ngarkuara me punë në Ambasadën Amerikane, Anu Prattipati, dhe adjutanti i përgjithshëm i Ajovës, gjeneralmajor Stephen Osborn.