Ndonëse marrëdhëniet midis Qeverisë së dominuar nga shqiptarët dhe pakicës serbe kanë qenë të tensionuara prej vitesh në Kosovë, të njëjtat janë rindezur sërish.
Kështu shkruan BBC, për zhvillimet e fundit në Veri të Mitrovicës, ku siç raporton e përditshmja britanike tensionet kaluan në mosbindje civile.
Kjo për shkak të vendimit të Qeverisë së Kosovës për reciprocitetin e targave dhe atij të dokumenteve, me Serbinë.
Një ditë para vendimit, në veriun e Mitrovicës u ndezën sirenat, qytetarët serbë kishin barrikaduar rrugët dhe kishin shtënë me armë zjarri. E gjithë kjo si shenjë proteste.
Megjithatë, Qeveria e Kosovës shtyu zbatimin e rregullave të reja për një muaj.
Kjo pas kërkesës së ambasadorit amerikan në Kosovë, Jeffrey Hovenier.
Por a është e përfshirë këtu Rusia?
BBC teksa ka shkruar për ngjarjen, ka theksuar qëndrimin e Qeverisë së Kosovës, nga e cila thotë se Serbia po nxit tensione etnike dhe Rusia po e mbështet atë.
Pas pushtimit rus në Ukrainë, Serbia refuzoi t’i bashkohej regjimit të sanksioneve të vendeve të tjera evropiane.
Në vend të kësaj, në maj presidenti i Serbisë, Aleksandër Vuçiq, nënshkroi atë që ai tha se ishte një marrëveshje e favorshme gazi me presidentin rus, Vladimir Putin.
Zëdhënësja e Ministrisë së Jashtme ruse, Maria Zakharova, fajësoi për tensionin në Kosovë autoritetet kosovare që vendosin “rregulla të pabaza diskriminuese”.
Një deputet nga partia e Vuçiç-it tha se Serbia së shpejti do të detyrohet të fillojë “denazifikimin e Ballkanit” – duke përdorur të njëjtën gjuhë që presidenti Putin përdori për të justifikuar pushtimin e tij në Ukrainë. Më vonë ai kërkoi falje për fjalët e tij.
Ndërkaq, presidentja e Kosovës, Vjosa Osmani, tha se Putin mund ta përdorë Kosovën për të zgjeruar konfliktin aktual në Ukrainë dhe për të destabilizuar më tej Evropën.