Në një intervistë për gazetën italiane La Republica, kryeministri i Kosovës, Albin Kurti, ka folur për situatën tensionuese që ishte krijuar mbrëmjen e 31 gushtit në veri të Kosovës.
Ai ka thënë se ekziston mundësia për një konflikt të ri në mes të Kosovës dhe Serbisë, dhe për këtë gjë e ka fajësuar shtetin serb. Sipas kryeministrit të Kosovës, prapa vendimeve dhe veprimeve të Serbisë qëndron presidenti rus Vladimir Putin.
“Rrezikojmë luftë. Pas Serbisë është Putini. Nuk do të thosha se rreziku është shumë i madh, sepse ne kemi edhe një kontingjent të NATO-s këtu, por sigurisht që është i lartë. Ne jemi një demokraci që kemi një autokraci në kufij”, ka deklaruar Kurti.
Në lidhje me protestat e dhunshme të serbëve në veri, Kurti ka thënë se ato kanë qenë të organizuara nga Serbia, sipas tij me mbështetje nga Rusia.
“Serbët kanë 48 baza nëpër Kosovë. Protestat nuk kanë qenë spontane, ato janë organizuar nga Beogradi me mbështetjen e Rusisë”, ka thënë Kurti për “La Repubblica”.
Po ashtu, kryeministri i Kosovës foli edhe për sulmet e fundit me armë zjarri ndaj zyrtarëve policorë në veri të Kosovës. Sipas tij, këto sulme janë të dirigjuara nga Beogradi.