Kryeministri i Kosovës është shprehur i lumtur për miratimin e Rregullores së re të punës së Kuvendit të Kosovës, e cila u votua më datën 28 korrik të këtij viti.
Kurti ka folur për problemet dhe ngecjet për votimin e kësaj rregulloreje në të kaluarën.
“Miratimi i Rregullores vjen pas një përpjekjeje të gjatë të Kuvendit të Kosovës për të rishikuar rregullat e funksionimit të institucionit më të lartë. Procesi i rishikimit të Rregullores kishte filluar në vitin 2012 dhe kishte vazhduar në secilën legjislaturë, me qëllim të adresimit të problemeve të identifikuara që nuk funksiononin, por që pavarësisht nevojës e përpjekjeve, miratimi i saj nuk kishte ndodhur”, ka shkruar Kurti në Facebook.
Ai i ka përmendur sfidat e miratimit të rregullores, për shkak se kërkoheshin 2/3 të votave të të gjithë deputetëve të Kuvendit të Kosovës.
“Miratimi gjithmonë ka qenë një sfidë politike për Kuvendin, për shkak se për miratimin e saj kërkohej një shumicë e kualifikuar e së paku 2/3 e votave të të gjithë deputetëve të Kuvendit. Kjo kërkonte një koncensus të gjerë të spektrit politik të përfaqësuar në Kuvend”, ka shkruar Kurti.
Sipas kryeministrit të Kosovës, Rregullorja e re adreson sfidat kryesore, të cilat e kanë përcjellë punën e Kuvendit që nga viti 2010.
Kurti ka shkruar se kanë qenë dy faktorë kryesorë që e kanë penguar miratimin e Rregullores së Kuvendit:
“Dy kanë qenë faktorët kryesorë që e kanë penguar përfundimin e këtij procesi më parë: jostabiliteti institucional dhe mungesa e vullnetit politik të subjekteve politike në Kuvend”, ka thënë ai.
Në fund, kryeministri i Kosovës ka thënë se të gjithë duhet të angazhohen që niveli i punës dhe llogaridhënies së Kuvendit të Kosovës të bëhet shembull për përgjegjshmëri.