Kryeministri i Malit Zi, Dritan Abazoviq, së bashku me ministrin e Shëndestësisë, Dragoslav Šceekić, kanë vizituar spitalin e Beran-it. Përmes një postimi në rrjetin social Facebook ka bërë të ditur se për këtë spital kanë ndarë mbi 2 milionë euro.
Tutje, Abazoviq ka treguar se investimi ka për qëllim përmirësimin e infrastrukturës shëndetësore të spitalit në qytetin e Beran-it.
“Qendra e Beran-it do të ketë një dhomë moderne angio, një mamografi, një ambient të ri radiologjik, rindërtim të godinës së neurologjisë dhe një njësi të kujdesit intensiv”, ka shkruar në Facebook Abazoviq.
Ndërsa, Ministri i Shëndetësisë, Dragoslav Šceekić, ka shkruar në Facebook se ai beson se në vitin e ardhshëm do të ketë më pak të infektuar dhe do të fillojë viti shkollor pa maska.
“Unë besoj se do të ketë gjithnjë e më pak të infektuar dhe se vitin shkollor do ta fillojmë pa maska”, ka thënë ministri i Shëndetësisë Dragoslav Šćekić në Berane.
Ai ka thënë se është duke e pritur “propozimin e masave të reja që do të lejojnë funksionimin e qetë të fëmijëve në shkolla dhe punonjësve”.