Ministria e Punëve të Jashtme të Francës, përmes një njoftimi ka thënë se e mbështet plotësisht Bashkimin Evropian, si ndërmjetësues në dialogun mes Kosovës dhe Serbisë.
Në njoftim thuhet se Franca e mbështet dialogun si proces të një marrëveshjeje përfundimtare që do t’i largonte tensionet në mes të dy vendeve ballkanike.
“Franca mbështet plotësisht ndërmjetësimin evropian, i cili duhet të mundësojë arritjen e një marrëveshjeje përfundimtare, globale dhe ligjërisht të detyrueshme ndërmjet Serbisë dhe Kosovës”, thuhet në njoftimin e MPJ-së së Francës.
Tutje, në njoftim u është bërë thirrje të dyja palëve, kosovare dhe serbe që të përmbahen nga cdo lloj veprimi të njëanshëm që do të nxiste tensione të mëtutjeshme.
Po ashtu, Franca ka kërkuar që të implementohen marrëveshjet e përfunduara në Bruksel.
“Ai u bën thirrje fuqimisht të dy palëve që të vazhdojnë diskutimet në ditët në vijim në frymën e kompromisit, të zbatojnë marrëveshjet e përfunduara tashmë dhe të përmbahen nga çdo masë e njëanshme që mund të nxisë tensionet”, vijon njoftimi.
Kryeministri i Kosovës, Albin Kurti dhe presidenti i Serbisë, Aleksandër Vuçiq, janë takuar të enjten në Bruksel. Pas më shumë se pesë orëve që ka zgjatur takimi, ata janë larguar pa arritur ndonjë marrëveshje.
Ndërkaq, dialogu në mes të dy krerëve pritet të vazhdojë edhe ditëve në vijim, por për një gjë të tillë nuk është dhënë ndonjë datë.