Kryeministri i Republikës së Kosovës, Albin Kurti, të mërkurën e 24 gushtit do të mbajë mbledhjen e kabinetit qeveritar, ku pritet të japë detaje nga bisedimet e 18 gushtit në Bruksel, me presidentin e Serbisë, Aleksandar Vuçiq.
Sipas zëdhënësit të Qeverisë, Përparim Kryeziu, Kurti do t’iu adresohet ministrave qysh në fillim të mbledhjes së qeverisë.
“Në lidhje me takimin e datës 18 gusht në Bruksel, kryeministri Kurti do të flasë këtë të mërkurë në adresimin e tij në fillim të mbledhjes së kabinetit qeveritar”, ka thënë Kryeziu.
Tutje, ai ka përfunduar duke thënë se në orën 11:00 do të mbahet mbledhja e radhës e qeverisë.
Përfaqësuesi i lartë i BE-së për Politikën e Jashtme, Josep Borrell, ka bërë të ditur se në takimin në mes të kryeministrit Albin Kurti dhe presidentit të Serbisë, Aleksandar Vuçiq, nuk u arrit asnjë marrëveshje.
Në një konferencë për media ai tha, se përkundër dështimit për një marrëveshje, dialogu do të vazhdojë ditëve në vijim.
“Fatkeqësisht nuk kemi arritur marrëveshje në takimin e sotshëm, por nuk është përfundimi i këtij tregimi, të dy liderët janë pajtuar që procesi duhet të vazhdojë që diskutimet të rifillojnë në ditët në vijim, ka kohë deri më 1 shtator, nuk ka marrëveshje ditën e sotme, do të vazhdojmë kërkimin për zgjidhje, ky diskutim do të vazhdojë”, ka deklaruar Borrell.
Borrell pas takimit Kurti-Vuçiq: Nuk ka marrëveshje, dialogu do të vazhdojë ditëve në vazhdim