Për 23 vjet me radhë, lotët kësaj zonje nuk iu ndalën.
Disa nga familjarët e saj, u zhdukën me dhunë nga ushtria serbe gjatë luftës së fundit në Kosovë.
E fati i njëjtë e përcolli edhe Havë Kelmendin nga Mitrovica.
Që në vitin 1998, bashkëshortin ia zhdukën me dhunë ushtarët e paramilitarët serbë.
Gjersa Kelmendi nuk ka asnjë informacion për fatin e bashkëshortit, ajo kujton momentin e fundit me të.
“S’na kanë jep kohë as me fol as me u përshendetë, veç se janë marrë ata dy dhe ne kemi vazhduar rrugën së bashku me tre fëmijët e mi”, ka deklaruar Kelmendi.
E pas ndarjes, Hava tregon frikën e saj, që kishte derisa po migronte për në Shqipëri.
“Kemi hyrë në një kombi të mbyllur, dhe vetëm kemi dëgjuar se mos po shtinin më armë ushtarët serbe mbi burrin e familjarët tanë, e më forcë na shtyn të shkojmë në Shqipëri, asnjëherë nuk kemi pasur lajm që dikush e ka parë të vrarë ose që është i gjallë dikun, kam kontaktuar edhe me avokat serb, por s’kemi marrë aasnjë informacion”, ka shtuar ajo.
Të njëjtin fat e ka edhe Selami Hoti nga Krusha e Madhe, që të zhdukur nga lufta e fundit e ka ende babanë.
Ai ka rrëfyer një bisedë mes tij dhe të atit, kur në të dy krahët e kishin kapur ushtarët serb.
“Babi më tha, Serbia është një armik shumë i keq…”, ka deklaruar Hoti.
Si në tërë botën edhe në Kosovë është shënuar Dita Ndërkombëtare e të Zhdukurve.
Familjarët, kanë kërkuar nga qeveria por edhe nga ndërkombëtarët që të angazhohen më shumë në zbardhjen e fatit të tyre. Më shumë se 1 mijë e 600 persona figurojnë si të pagjetur.