Mikhail Gorbachev, lideri i fundit sovjetik që solli përfundimin paqësor të Luftës së Ftohtë, do të varroset të shtunën në Moskë, katër ditë pasi vdiq në moshën 91-vjeçare.
Presidenti rus, Vladimir Putin, nuk do të marrë pjesë në funeralin për shkak të orarit të tij të punës, ka bërë të ditur Kremlini.
Megjithatë, kjo shihet gjerësisht si një nënçmim ndaj njeriut që mbikëqyri shpërbërjen e Bashkimit Sovjetik (BRSS).
Putin dikur e quajti shpërbërjen e BRSS si “katastrofën më të madhe gjeopolitike të shekullit”.
Gorbachev mori pushtetin në 1985, duke prezantuar reforma të guximshme dhe duke hapur BRSS ndaj botës.
Por ai nuk ishte në gjendje të parandalonte kolapsin e bashkimit në 1991 dhe shumë rusë e fajësojnë atë për vitet e trazirave që pasuan.
Jashtë Rusisë, ai respektohej gjerësisht, Sekretarin e Përgjithshëm të OKB-së, António Guterres tha se ai kishte “ndryshuar rrjedhën e historisë”, kurse presidenti i SHBA, Joe Biden, e quajti atë një “lider me vizion të jashtëzakonshëm”.
Sipas Fondacionit Gorbachev, anëtarët e publikut duhet t’i bënin nderimet e fundit zotit Gorbachev në Sallën historike të Kolonave të Shtëpisë së Sindikatave – si disa nga paraardhësit e tij sovjetikë, duke përfshirë Vladimir Lenin, Joseph Stalin dhe Leonid Brezhnev, njofton BBC.