“E vërteta padyshim s’është kjo sepse Kosova për ne është e shenjtë, ashtu siç është e shenjtë kauza e shqiptarëve në rajon. E vërteta është shumë më e thjeshtë dhe ka dy pjesë. Në njërën anë, kjo nismë është një mekanizëm që zbaton e përshpejton proceset e parashikuara në Procesin e Berlinit. Përshpejtim i cili sjell përfitime konkrete për të gjithë rajonin, përfshirë shqiptarët”, kishte thënë Xhaçka.
Olta Xhaçka ministre e jashtme e Shqipërisë ka thënë se prioritet mbetet kauza e shqiptarëve në rajon, të drejtat e shqiptarëve në rajon, në Maqedoninë e Veriut, në Malin e Zi dhe në Preshevë.
Kosova është e izoluar padrejtësisht, duke iu mohuar liberalizimi i vizave, ka thënë Xhaçka.
Gjatë kryesimit të Këshillit të Sigurimit (KS) nga ana e Shqipërisë, ajo tha se këtë çështje e kanë në prioritet gjatë punës së tyre.
Xhaçka shtoi se “puna që po bën Shqipëria në rajon në funksion të rritjes së bashkëpunimit rajonal, e posaçërisht puna për nismën Ballkani i Hapur, ka shkaktuar shqetësim tek një pjesë të forcave politike e të shoqërisë shqiptare në rajon, të cilat e kanë kuptuar këtë nismë si një zbehje të mbështetjes së Shqipërisë për Kosovën”.
Sipas kësaj të fundit, në çdo takim bilateral ajo është duke lobuar për njohje e për anëtarësimin e Kosovës në organizatat Ndërkombëtare, në veçanti në Bashkimin Evropian (BE), dhe tek vendet anëtare duke denoncuar, padrejtësinë që po i bëhet Kosovës.
Është vend i vetëm i izoluar në mes të Evropës, pavarësisht premtimeve që nuk u mbajtën për liberalizimin e vizave nga BE-ja. Kosova është detyre e jona edhe në KS, ku po punojmë pa u lodhur jo vetëm për sa i përket pakësimit të raportimeve të UNMIK në Këshill, por edhe për të zgjeruar marrëdhëniet me ato vende, si për shembull në Afrikë, ku procesi i njohjeve nuk ka ecur mbarë e ku ende duhet shumë punë.