Presidentja e Kosovës, Vjosa Osmani, ka pritur në takim zyrtar dhe me nderime shtetërore, presidenten e Hungarisë, Katalin Novak.
Pas takimit, të dyja presidentet do të mbajnë edhe një konferencë të përbashkët për media.
Ndërkaq, për shkak të vizitës së presidentes së Hungarisë, Policia e Kosovës ka bërë të ditur se do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë.
Ndryshe, Katalin Novak, në mars të këtij viti u zgjodh presidentja e parë grua e Hungarisë me mandat pesëvjeçar.
Ajo ka mposhtur rivalin e saj të opozitës, ekonomistin Peter Rona.
Kosova, kohët e fundit është vizituar edhe nga presidenti slloven, Borut Pahor.
Ai ka thënë se Kosova i ka plotësuar kriteret për liberalizim të vizave dhe është një ndër vendet që është gërshetuar tashmë me vlerat evropiane. Ndërsa, sa i përket dialogut Kosovë-Serbi, ai ka thënë se duhet të ketë rezultat në implementimin e marrëveshjeve dhe jo vetëm pajtim në ato çështje.
Ndërkaq, Presidentja e Kosovës, Osmani ka thënë se Sllovenia vazhdon të jetë zë i fortë që ka mbështetur Kosovën në procesin e liberalizimit të vizave. Ajo shpreson që të ketë një vendim final në muajt e ardhshëm sa i përket çështjes së vizave, sepse siç thotë ajo, kriteret janë përmbushur që një kohë të gjatë.
Ndryshe, presidentja e Republikës së Kosovës, Vjosa Osmani, krahas presidentëve të shteteve të rajonit ka marrë pjesë në takimin e 11-të të procesit Brdo-Brione.
Ajo ka thënë se asnjë nga vendet anëtare të Bashkimit Evropian nuk është deklaruar kundër liberalizimit të vizave për qytetarët e Kosovës.
Ballkani Perëndimor ishte një ndër temat e diskutuara në samitin e 11-të të Brdo-Brione, në të cilin mori pjesë edhe Osmani krahas presidentëve të vendeve të tjera. Gjersa ka vlerësuar rolin e Sllovenisë dhe Kroacisë për integrimin e Ballkanit Perëndimor në Bashkimin Evropian, Osmani ka thënë se ky është momentumi më i mirë në këto katër vitet e fundit për liberalizimin e vizave.
“Aktualisht nuk ka vend në Bashkimin Evropian që na thotë se është kundër liberalizimit të vizave. Ky është momentum më i mirë në këto katër vitet e fundit për liberalizimin e vizave. Pra momentumi është i shkëlqyeshëm dhe kemi mbështetjen e nikoqirit. Shpresojmë që gjatë tetorit do të ketë takim për liberalizimin e vizave dhe pastaj në samitin e ardhshëm BE-Ballkan Perëndimor të ketë diçka më shumë. Me rëndësi është që ky proces të bëhet gjatë presidencës çeke të BE-së”, ka deklaruar Osmani.
Ndër të tjera, Osmani ka përmendur edhe aplikimin e Kosovës për statusin e vendit kandidat për Bashkimin Evropian, për të cilin ka thënë se shpreson që të pranohet nga secili shtet i BE-së.