Ministri i Shëndetësisë, Rifat Latifi, pas takimit me eurodeputetin austriak, Lukas Mandl, në një konferencë për media ka thënë se është shumë mirënjohës për angazhimin e tij që është duke e bërë në institucionet e Bashkimit Evropian(BE).
Ministri, ndër të tjera, ka thënë se ekziston vizioni i qartë se si do të duket sistemi shëndetësor pas 5-10 vjetësh.
“Ne kemi bërë analizë, kemi krijuar strategji afatmesme dhe afatgjatë të bazuara në nevojat e sistemit shëndetësor të Kosovës. Ne kemi vizion të qartë se si do të duket sistemi shëndetësor pas 5-10 vjetëve të ardhshme”.
Ndër të tjera, ai ka listuar disa shtylla të cilat sipas tij janë për përmirësimin e gjendjes në sistemin shëndetësor.
“Digjitalizimi i shërbimeve shëndetësore, përfshirë sigurimet shëndetësore; Kthimi i “trurit” të humbur dhe ruajtja e trurit shëndetësor që ekziston tani, përmes programeve konkrete në shëndetësi; Qendrat klinike të ekselencës dhe shërbimet e avancuara klinike; Kërkimet shkencore dhe krijimi i kapaciteteve hulumtuese; Proceset e akreditimit ndërkombëtar; Përmirësimi i cilësisë së shërbimeve mjekësore; Decentralizimi i sistemit spitalor dhe riorganizimi i ShSKUK/QKUK”.
Po ashtu, ai e falënderoi deputetin Mandl për vizitën e tij në Prishtinë, derisa ka theksuar se Austria ka mbështetur kërkesën për anëtarësimin e Kosovës në Këshillin e BE-së.
“Unë jam shumë mirënjohës për angazhimin tuaj të jashtëzakonshëm që keni bërë dhe po bëni në institucionet e BE-së, në mënyrë që të lehtësohet lëvizja e mjekëve tanë dhe qytetarëve tanë”.
Sipas Latifit, mosanëtarësimi në organizatat ndërkombëtare ka ndikuar edhe në sistemin shëndetësor të Kosovës.