Dibran Hoxha, aktivist i shoqërisë civile ka thënë se sindikatat që nuk përfaqësojnë interesat e punëtorëve duhet të përjashtohen nga ndihma e shtetit.
Sipas tij, punëtorët e sektorit privat trajtohen në mënyrë ç’njerëzore duke mos pasur as sigurime shëndetësore.
“Këta duhet të përjashtohen nga ndihma e shtetit, asnjëherë nuk i kemi dëgjuar të diskutojnë për kushtet e punëtorëve të sektorit privat”, kështu i është drejtuar Hoxha kryetarit të Sindikatës së Pavarur të Sektorit Privat, Jusuf Azemi në emisionin “Debat Plus”.
Hoxha ka thënë se krerët e sindikatave e kanë interesin e lidhur ngushtë me pagën dhe nuk përfaqësojnë dinjitetshëm sindikatat, duke përmendur ata të sektorit privat dhe SBAShK-un.
Sipas tij, SBAShK-u nuk duhet ta mohojë koalicionin me PAN-in, koalicion i cili sipas tij është bërë për kalkulime elektorale.
Hoxha: Kush po e ndalon qeverinë të fillojë reformën e thellë në arsim?
Po ashtu ai ka kërkuar edhe nga deputeti i VV-së, Armend Muja të sqarojë se pse Ministria e Arsimit nuk po fillon me reforma të thella në gjithë nivelin e arsimit.
“Të fillojë reforma sidomos në rastin e SBAShK-ut, të cilët i relativizojnë rezultatet e PISA-s dhe që nxjerrin analfabetë funksionalë”.
Sipas tij, nuk duhet të ketë vonesë të testimit dhe vlerësimit sipas performancës së mësimdhënësve.
“Të qenët analfabetë funksionalë në Kosovë nuk është marre, është në rregull sepse ashtu është sistemi”.