Kryetari i Partisë Demokratike të Kosovës(PDK), Memli Krasniqi, ka uruar Kryeministrin e Shqipërisë dhe njëherësh kryetarin e Partisë Socialiste(PS), Edi Rama për fitoren në zgjedhjet parlamentare të mbajtura të dielën e kaluar, ku PS siguroi mbi 50% të votave.
Në një postim në Facebook, Krasniqi ka thënë se “Shqipëria po vazhdon rrugën e stabilitetit dhe zhvillimit” dhe shprehu shpresën që mandati i ri i qeverisë të shërbejë për ta afruar vendin edhe më shumë drejt anëtarësimit në Bashkimin Evropian(BE).
Ai gjithashtu vlerësoi rëndësinë e Samitit të Komunitetit Politik Evropian, që do të mbahet më 16 maj në Tiranë me pjesëmarrjen e 55 liderëve evropianë, duke e cilësuar si “dëshmi e punës dhe vizionit të arritshëm për ‘Shqipëria 2030’.”
“Suksese në këtë rrugëtim të rëndësishëm për gjithë qytetarët shqiptarë,” përfundoi ai, duke shoqëruar urimin me flamurin e Shqipërisë dhe atë të Bashkimit Evropian.