Kryeministri në detyrë i Malit të Zi, Dritan Abazoviq, ka uruar Qeverinë e Kosovës për aplikimin e saj për anëtarësim në Bashkimin Evropian (BE).
“Urimet më të përzemërta Qeverisë së Republikës së Kosovës për aplikimin për anëtarësim në BE dhe arritjen e liberalizimit të vizave”, ka shkruar Abazoviq në Twitter.
Sipas tij, ky akt historik për Kosovën fuqizon aspiratat e Ballkanit Perëndimorë për integrim në familjen e madhe evropiane.
Po ashtu, ai ka bërë të ditur se shteti i Kosovës do të ketë “mbështetje të sinqertë dhe të plotë” të Malit të Zi në rrugëtimin e saj drejt BE-së.
Po ashtu, një urim për Kosovën për aplikimin për anëtarësim në BE, ka ardhur edhe nga presidenti i Malit të Zi, Milo Gjukanoviq, i cili ka thënë se ky është hapi i parë drejt së ardhmes evropiane.
Ndryshe, përfaqësuesit e Parlamentit dhe Këshillit Evropian kanë arritur të mërkurën, marrëveshjen për liberalizimin e vizave për Kosovën.
“Të mërkurën ekipet negociuese të Parlamentit dhe Këshillit arritën marrëveshjen e shumëpritur për liberalizimin e vizave për Kosovën”, thuhet në njoftimin për media të Parlamentit Evropian.
Më 30 nëntor, ambasadorët e vendeve anëtare të BE-së ishin pajtuar për t’i dhënë mandatin Këshillit Evropian që të negociojë procesin e liberalizimit të vizave për Kosovën me Parlamentin Evropian.
“Heqja e vizave do të hyjë në fuqi kur sistemi evropian i udhëtimit, ETIAS, të jetë funksional, në çfarëdo rasti jo më vonë se më 1 janar të vitit 2024”, thuhet në këtë njoftim.
ETIAS kërkon që qytetarët e huaj, të cilët udhëtojnë pa viza në territorin e BE-së, t’i regjistrojnë të dhënat e tyre në këtë sistem para udhëtimit.