Kryetari i Lidhjes Demokratike të Kosovës (LDK), Lumir Abdixhiku, ka thënë se rasti i publikuar të mërkurën, lidhur me keqtrajtimin e të moshuarës në shtëpinë e të moshuarve, duhet të shërbejë si një zë zgjimi për çdo insitucion të Kosovës.
Një reagim i tillë nga Abdixhiku, vije pas publikimit të një video-je ku tregohej një grua, pjesë e Qendrës për të moshuar në Pejë, e cila keqtrajtonte të moshuarën në po të njëjtën shtëpi.
“I shokuar e tronditur nga dhuna e ushtruar ndaj një zonje të moshuar. Edhe më shumë nga indiferenca e vëzhgueseve të kësaj dhune. Pafuqia e asaj zonje, thirrjet e saj që s’kishte kush t’i dëgjonte aty, duhet të shërbejnë si zë zgjimi për çdo insitucion shtetëror sot”, ka shkruar Abdixhiku.
Krahas kësaj, ai ka thënë se ngjarjet si kjo, përveç se ta këpusin emocionalisht, ato tregojnë një realitet të hidhur të shoqërisë. Sipas tij, kundër dhunës do të duhej të ngrihen të gjithë.
Zëdhënësi i Policisë në Pejë, Fadil Gashi, për Portalin Dukagjini, ka konfirmuar se janë arrestuar dy të dyshuarat në lidhje me rastin e keqtrajtimit të së moshuarës në shtëpinë e pleqve në Pejë.
Ai ka bërë të ditur se është arrestuar e dyshuara, e cila shihet në video duke e keqtrajtuar të moshuarën si dhe përgjegjësja kryesore e shtëpisë së pleqve në Pejë, si e dyshuar për mosraportim të rastit.
Punëtoret e Qendrës për të moshuar në Pejë “Orenda”, kanë rrahur fizikisht një të moshuar.