Kryetari i Lidhjes Demokratike të Kosovës (LDK), Lumir Abdixhiku, përmes një postimi në rrjetin social Facebook, ka treguar se LDK-ja po vazhdon takimet me qytetarët, dhe këtë po e bën për të ndryshuar vendin dhe për të rritur bashkëpunimin me ta.
Abdixhiku i ka vendosur theks të veçantë krizës ekonomike dhe shoqërore, në të cilën, Kosova po kalon, duke shtuar se këto janë brengat, të cilat LDK-ja po i trajton në secilin takim.
“Kosova po kalon nëpër një periudhë të rëndë ekonomike e shoqërore. Çmimet e larta, pagat e ulëta, furnizimi energjetik, mungesa e investimeve kapitale, rrënimi shëndetësor, kriza në arsim e ikja e të rinjve, janë brengat e shprehura në çdo takim”, thuhet në postimin e kryetarit të LDK-së.
Lidhur me këtë, ai ka thënë se qytetarët tanë janë ngopur me arsyetimet mbi të shkuarën, duke shtuar se ata kanë kërkuar një Kosovë më ndryshe.
“Qytetarët tanë janë ngopur me arsyetimet mbi të shkuarën, siç po lodhen me polarizimin e skajshëm shoqëror që po u servohet në vazhdimësi. Kjo nuk është Kosova që e kanë kërkuar si ndryshim”, ka thënë Abdixhiku.
Tutje, Abdixhiku ka shtuar se LDK-ja po punon që shoqëria kosovare të zhvillohet sa më shpejtë.
Njashtu ka theksuar faktin se Lidhja Demokratike e Kosovës, është zëri i qytetarëve. Sipas tij, për të arritur një Republikë të duhur, LDK-ja po realizon këto takime në çdo fshat dhe qytet të vendit.
“Shoqëria jonë meriton hapa të shpejtë zhvillimor drejt së ardhmes, që kjo gjeneratë politike duhet ta krijojë. Ky është qëllimi ynë. Ne kemi një plan; kemi dhe ekip të denjë e të përgjegjshëm për të dërguar Republikën në drejtimin e synuar gjithherë. Për të bërë këtë rrugëtim, do të flasim, do të takojmë, e do të punojmë në çdo fshat e çdo qytet të vendit tonë. Do të jemi zë i qytetarëve tanë sot, për të qenë ndryshues të vërtetë nesër. LDK ju dëgjon”, ka përfunduar Abdixhiku.