Ambasadori i Britanisë së Madhe në Kosovë, Nicholas Abbott, ka uruar besimtarët myslimanë me rastin e përfundimit të muajit të Ramazanit dhe pritjen e festës së Fitër Bajramit.
Ai përmes një postimi në llogarinë e tij në Facebook, ka uruar paqe e prosperitet.
“Urime Fitër Barjamin për të gjithë ata që festojnë! Ju uroj gëzim, paqe dhe prosperitet”, ka shkruar Abott.
Ndryshe, Myftiu i Kosovës, Naim Tërnava, në adresimin e tij është shprehur se kjo festë që troket te të gjitha shtresat e popullatës me porosi e mesazhe të ngrohta, gjithnjë në funksion të afrimit me rahmetin e Krijuesit të gjithësisë, i cili për agjërimin ka premtuar shpërblim të veçantë.
Myftiu ka shtuar se pas dy vjete që i kaluam në përballje me pandeminë Covid-19, kësaj radhe, falë Zotit të Madhëruar, Ramazanin që po e përmbyllim dhe festën e Fitër-Bajramit, nga e cila na ndajnë vetëm edhe pak orë, e shijuam pa masa kufizuese, rikthyem atmosferën e Ramazanit në shtëpitë tona, bëmë namaze e ibadete nëpër xhamitë tona anekënd vendit, vizituam njëri-tjetrin, me një fjalë, shijuam mirësitë e Ramazanit ashtu siç e meriton ky muaj i bekuar.
“Dashtë Zoti që të mos përballemi më me masa kufizuese, të cilat qenë të domosdoshme, por krijuan një lloj distance ndërmjet nesh”, ka thënë Tërnava.
Festa e Fitër Bajramit pason Muajin e Ramazanit, gjatë të cilit besimtarët myslimanë agjërojnë për 30 ditë, në shenjë sakrifice dhe përkushtimi ndaj Zotit.